黃漢興睇戲論招才
大新金融（00440）行政總裁黃漢興（Derek）都有留意開電影，尋日大新人壽為招募同培訓中心揭幕，佢就用電影《建國大業》嚟比喻吸納人才嘅重要性。
Derek話金融服務業最着重嘅應該喺人才競爭，咁先可以建立長遠嘅發展基礎。就好似電影入面兩個黨咁，一個就掛住攻城掠地，一個就着力吸納人才拉攏民心，所以最終都係「重人」嘅後者可以一統全國。
派定心丸不裁員
人才除咗招募同培訓外，都需要識得挽留。大新銀行（02356）行政總裁王祖興就大派定心丸，話佢哋業務發展順利，目前無計劃裁減員工，反而會繼續招聘人手添。據知，大新人壽計劃年底前增聘150位前線員工。
大新對新培訓中心好重視，一眾管理層包括久未露面嘅大新金融集團主席王守業都有出席開幕儀式；據講個中心花咗逾百萬元裝修，取名大新聚賢堂。
黃漢興（右一）表示，對新培訓中心嘅成立期待好耐。左二為王守業。