股海實戰：東風睇位坐順風車

歐元區落實向希臘提供新一輪救助計劃，歐債危機暫緩；另一邊廂，美國政府繼續積極就提高發債上限問題與國會洽商，若然本周問題順利解決，或可刺激美股表現，且看今次道指反抽能否突破五月高位12,876點。

港股方面，上周五受外圍股市高收帶動，恒指高開244點，午後回吐壓力有限，尾市抽至全日高位22,449點，收報22,444點，升457點，成交727億元。論走勢，本月中旬恒指50日線插穿250日線後，大市走勢轉弱，目前50日及250日線分別處於22,501點及22,840點，先觀望今浪反彈能否重返兩線之上，再評論是否轉勢亦未遲！

半新股紛紛起動

本地金飾及鐘錶零售股長炒長有，六福（00590）、英皇鐘錶（00887）以及東方表行（00398）均迭創五十二周新高，追落後較冷門可吼景福集團（00280）以及謝瑞麟（00417）。此外，近月掛牌嘅半新股收貨過後紛謀起動，新秀麗（01910）重上水面後未見太大回吐壓力，青蛙王子（01259）正謀重上招股價2.6元之上，短線氣氛仍在嘅話，不妨(目及)實中國光纖（03777）。

今年以來內地備受通脹上升之苦，企業尤其係中小企，經營日趨困難，若然第三季情況未有改善，今個年關唔知係咪「年年過」﹗工信部否認市傳廣東省出現中小企倒閉潮，更揚言正研究進一步扶持中小企發展嘅措施。政府提供融資渠道，短期也許能幫上忙，但長遠而言，參考七、八十年代香港經濟轉型嘅經驗，廣東省必須加快拓展服務性行業，協助勞工及企業轉型，始能找到出路。

「中投三寶」上周五有起色，旭光（00067）、中芯（00981）及保利協鑫（03800）升幅介乎4.9至8.5%。不過，阿莊認為，三寶之中，得隻保利協鑫比較似樣，而旭光同中芯只能看成極度超賣下嘅反彈，除非有重大的利好消息出現，否則還要提防「死貓彈」。

政策風險見紓緩

上半年內地汽車銷量總數932萬輛，較去年同期增長3.4%。不過，若單計六月，汽車銷量為144萬輛，按月增長3.6%，扭轉前兩月嘅跌勢，成為汽車股反攻嘅藉口。華晨（01114）上周五再創五十二周高位9.86元；東風集團（00489）亦唔輸蝕，一度高見16元，最後收報15.98元，升4.4%。

雖然有關發改委上報國務院上半年汽車銷售慘情，並建言暫停不利車市銷售措施未有下文，但阿莊認為，即使建言未獲接納，當局再推不利措施嘅可能性不大，這有助掃除汽車股嘅政策風險。

再講，如今內地車市銷售增長放緩，但唔係大跌，在行業發展日趨成熟之下，銷售前景穩定未必係壞事，反而汽車股表現取決車企銷售策略及研發能力。類似東風呢類龍頭車股，股價經歷咗大半年嘅調整，正呈圓底回升，可以睇位坐順風車。

戰報

寶姿（00589）

零售股續發神威，錢進早於七月十四日推介寶姿，股份上周五現大陽燭，較推介時低位16.22元升逾11%。

金山能源（00663）

志強上周五趁機點出金山能源，結果股份以全日高位收市，即日跟進收穫和味，立即執到11%。