魚缸Blogger：超威動力睇位買貨
歐債問題現曙光，帶領恒指上周五大升457點，報22,444點，一口氣收復10日同20日線。不過，從圖表上嚟睇，恒指已逼近中期降軌阻力，短線出現調整實在所難免，買咗貨嘅股友不妨逢高減持鎖定利潤。
值得一提嘅係，全球最大重型設備製造商Caterpillar季績差過預期，加上內地火車出現嚴重事故，相信有「中國Caterpillar」之稱嘅中聯重科（01157），同一眾相關股份，今日或跑輸大市。
受惠國策扶持
雖然有謂今年港股屬政策市，但無可置疑嘅係國策受惠股今年以來都盡顯強勢。超威動力（00951）為內地電動自行車專用鉛酸動力電池嘅龍頭生產商，無論喺內地「十二五」規劃加大發展新能源汽車嘅國策，抑或內地有關部門近月要求整頓電動自行車行業，集團均可受惠，加上內地電動自行車市場龐大，相信喺資金重新關注汽車電池股嘅情況下，超威股價有力更上一層樓。
超威上周五喺大成交配合下，先後突破三角形阻力同三個月嘅高位，不妨待其完成後抽，喺3.35元附近跟進，上望3.8元，穿3.1元止蝕。
