魚缸Blogger：慕詩有條件追落後

人行尋日傍晚宣布加息0.25厘，睇嚟內地收緊銀根嘅政策方向仍未有變。至於港股，淡馬錫前晚出其不意配售中行（03988）同建行（00939），令內銀股尋日普遍錄得2至4%跌幅。查實一眾外資大行都揸咗四大內銀唔少貨，而美銀手上批建行下月禁售期到期，市場都估會係沽貨居多，相信內銀股仲有得跌。

唔計淡馬錫批貨，尋日港股全日成交近700億元，恒指落番去250日線樓下，且看能否喺回補近日上升裂口後，整固再上。

毛利率跑贏同業

通脹升溫除咗會令息口上升同企業成本增加外，同時亦會令工資上升同增加消費意欲。經營中高檔品牌服裝嘅慕詩國際（00130），去年純利按年增長44%，至7,855萬元，毛利率高達81%，大幅拋離業務類近嘅JOYCE（00647）同I.T（00999）的54.9%同63.3%水平，而慕詩嘅市盈率不足十倍，息率就高達6厘，大有追落後條件。

該股尋日喺大成交配合下創今年以來高位，不妨待股價回試2.6元水平伺機吸納，目標叩3元關，跌穿2.4元止蝕。

慕詩國際（00130）

目標價：3.0元 止蝕價：2.4元