Fundman睇市：歐舒丹想買等多陣

問筆者，若然手上有隻股票，四日跌三成點辦？老實講，如果公司係唔賺錢、業務無前途、純炒概念嘅垃圾股，必定係止蝕而後快，可是像雨潤（01068）一類，一個星期前還一片光明，突然間大孖沙好像怕二○一二年世界末日將至一樣，要錢唔要貨，筆者都唔識點答！

雨潤管理層前晚透過電話會議，同班分析員及芬佬解畫，由大行簡訊得知，內容大致圍繞上半年毛利高企，至少優於同業平均水平，擴大屠宰場的計劃仍按預期進行，但立立亂之際，這類營運數據最多令揸家安心，難令炒家放心。尋日所見，2.3億股易手，45.6億元成交額，全日2,071萬股沽空，雖比前日少110萬，但和六月中平均每日200萬股左右沽空比較，空軍實力唔講得笑。基本因素上，雨潤預期市盈率十五倍，估值同○八年金融海嘯期間低位看齊，咁嘅水位仲有「吉士」借貨沽空？話冇嘢係班春江鴨知而公眾唔知嘅，史提芬打句問句都唔會信。

美股前晚升108點，報12,043點。尋日港股高開127點，又被淡友壓番轉頭，尾市僅升20點，報22,061點。結算前夕，六、七月期指低水幅度擴大，淡友仲係控制大局，今個星期得四個交易日，關鍵係星期三希臘國會就緊縮開支進行表決，看官們不妨留意事態發展。

TCL收購效用微

久違的TCL多媒體（01070）有新搞作，以6.56億元（人民幣．下同）的等值新股（每股作價3.2港元），向母公司收購TCL光電科技（TOT），後者主要為本身及其他廠家提供26至46吋薄膜液晶顯示器模組（LCM）。睇到消息，筆者一度十分感興趣，因為大股東肯溢價變相增持，可能係明益TCL的交易，可惜一睇通告，TOT去年做13.5億元生意，賺830萬元，唔多似可以即時幫TCL業績打補針，有三級跳嗰款，四月股價抽高之後，預期市盈率13.1倍，看來已足夠反映業績由虧轉盈的可能性。

環球護理品牌歐舒丹（00973）出成績表，同大行預期相若，去年銷售額及純利升26.1%及21.5%，至7.72億及1.027億歐元（下同），增幅稍高於直營店數目的17.1%增長（截至年底895間）。幾個主要市場，日本、法國同美國的同店銷售分別升1.8%、4%、4.3%，新興市場表現更勁，中國、香港及俄羅斯分別達8.3%、18.4%及20%，全球品牌北望神州，歐舒丹管理層一樣，估一五年內地銷售收入會由目前佔4%提升至10%。

增長表現勝同業

上市剛超過一年，歐舒丹股價最高見24.45元，最低是上市之初的13.8元，現價19.02元，可謂中間落墨，大行預測明年盈利增長19.7%，賺1.23億歐元，市盈率20.8倍，PEG1.05倍，剛剛高過一倍的抵買標準些少。歐舒丹好處是分銷點遍全球，業務不受地區經濟影響，近年多得新興市場消費興旺，增長遠勝全球護理產品的銷售增幅，鑑於近期市況對高估值股份的抗拒，想買的不妨等多一陣，或者股價未必見到三月日本大地震後的15.9元，但18.5元樓下，PEG低於一倍，中長線會揸得比較安心。