Fundman睇市：內房反彈恒大值博

歐債危機先過一關，希臘議會就緊縮財政決議，以155票對143票通過；華爾街預期聯儲局議息會議，即使唔再開動印鈔機推QE3，也至少維持0至0.25厘的超低利率不變，美股反彈，前晚道指急升109點，報12,190點，跌了近兩個月的納指，更出現年內最大單日升幅，升2.2%或者57.6點，報2,687點。

外圍種種迹象顯示，港股尋日應該有相當可人的升幅，誰不知結果事與願違，恒指由早市最多升197點，到收市前一度倒跌，最後僅升9點，報21,859點，都算反高潮。

應升唔升，一來前日港股早就偷步升251點。再者，大市成交始終不足，陰陰乾情況持續，最弊係建行（00939）及農行（01288）等策略股東準備大手減持，即使有興趣買內銀的基金，都唔敢買住，事關未來將有數百億街貨流出，要幾多有幾多，都唔急於一時。

基金開始粉飾櫥窗

仲有六個交易日，便到基金半年結，儘管今年所見不少淨長倉（long only）基金表現相當肉酸，但半年結前點都要做番啲嘢，尋日所見部分基金重倉股，開始見粉飾情況，尤其有故事配合的汽車及水泥股，似乎未來幾日，這類股份都會成為焦點。

長倉就話有粉飾櫥窗，但畀對沖基金沽空嘅股份，到底有冇機會未來一星期翻身？尋日收到份外資行報告，列出過去兩星期累積沽空金額最大的股份名單，結果唔令人意外，滙控（00005）累積沽空7.2億美元排在榜首，沽空佔成交額29.9%；其次係港交所（00388）的3.21億美元，佔23.6%；建行（00939）2.98億美元，佔10%；聯通（00762）2.68億美元，佔20.5%；騰訊（00700）2.29億美元，佔13%。

看着呢一堆數字，滙控沽空大好合理，尤其最近歐美銀行股跌幅唔細。至於港交所，近期港股成交額愈玩愈縮，其下半年業績被下調可能性愈來愈大，博唔過！

建行沽空大大都可以補番，相信基金唔會放過這提款機贏到盡。聯通近幾個月跑贏中移（00941）太多，3G上客放緩，跌只是一個合理修正。反而筆者對博騰訊反彈最感興趣，尤其前晚新浪網（sina）在納市一彈就一成九，對比之下騰訊至少估值上比較「無咁貴」，相信短期反彈仲未完成。

銷售表現或有驚喜

內房股亦係筆者相信有機會出現反彈的板塊，不過同基金操作無關。美銀美林尋日出報告指，內地十四大城市上星期的住宅銷售樓面，按周回升15%，是六月初來首次，亦返到五月高位，而且一線城市中，深圳更錄得83%的銷售增長。由此推測，四五月麻麻哋的銷售數據過後，六月有機會畀到大家驚喜，催化內房股反彈。

純博反彈要搵足夠波動性，史提芬唔打算介紹Beta值較低的中國海外（00688），反而看上恒大（03333）。今年恒大股價由日本地震後低位3.25元起步，五月份最高升至5.9元，周二股價跌至4.2元，調整升幅六成四，相當足夠。技術走勢方面，陰陽燭圖出現倒轉錘頭，短期應已確認低位，博反彈目標可見5.3至5.5元。