股海實戰：信佳業績出色派高息

希臘危機有新發展，尋日港股藉勢反攻，惟恒指喺22,000點遇到阻力，加上聯儲局發表會議聲明前，有勇氣入場嘅投資者唔多，到歐洲股市開市表現偏軟，恒指尾市更一度出現倒跌，結果收報21,859點，升得嗰9點，成交額約650億元，好友一場歡喜一場空！

受到跌市氣氛影響，尋日傳來有新股打退堂鼓，臨陣取消上市計劃。不過，聽聞光大銀行爭取按原定計劃下月初在港掛牌，但為咗確保萬無一失，除咗敲定九大投行嘅大型承銷團外，仲會喺定價方面留有足夠水位畀投資者操作，都可以話喺誠意十足。

聯想4元邊可留意

呢期金魚缸鬧錢荒，「金魚」價格低殘，吸引實力嘅大股東入場增持，SDI顯示上實（00363）、恒地（00012）、TCL通訊（02618）、長實（00001）及和黃（00013）均獲大股東增持。阿莊估計，聯想（00992）股價落到4元邊，或會再獲得母公司增持，故不妨密切留意相關水平承接，捕捉反彈浪。

工業股信佳國際（00912）尋日宣布截至三月底止全年度業績，收益增長24%至11.9億元；純利增60%至9,040萬元；每股盈利33.51仙，末期息每股8仙，另加特別股息每股8仙，全年派息比率達62.6%。

由於業績佳兼派息慷慨，尋日午後股價一度抽高至2.98元，收報2.87元，升3.61%，成交1,376萬元。以現價計，往績市盈率降至8.5倍，息率達到7.3厘。

信佳主要做電子產品、模具及塑膠產品，其中以電子產品為主要收益來源，年內收入貢獻達11.37億元，佔總收入95%。旗下電子產品業務包括專門電子產品，如寵物培訓器材、專業音響設備、自動收費系統、互動教學產品以及一般消費電子產品等。

業績展望披露，預計本年度旗下大部分現有產品將繼續取得進展，其中專業音響設備嘅銷售額將進一步增加，而新電訊產品嘅貢獻將於本年度起首次全面反映，成為新嘅盈利增長點，另隨着自動收費系統生產恢復正常，銷售額會持續增加。

開拓內地寵物市場

由於公司嘅寵物培訓器材及互動教學產品業務，與海外龍頭企業建立良好合作關係，業務發展基礎穩定。此外，隨着內地加速城市化，中產人口上升，居民觀念由過往「背脊向天都可以入口」，改變為要「住洋樓養番狗」，公司亦睇準內地寵物市場嘅商機，已喺深圳開設三家以「樂森」品牌為名嘅寵物店，初步反應正面，更令呢隻工業股添上「內需」色彩！

今年係信佳嘅二十周年，業績表現理想加上派息慷慨，股東應該感到滿意。公司本年度盈利前景展望正面，加上現價估值具防守性，可留意喺2.8元邊或樓下上車嘅機會，保守地按預測每股盈利增長兩成，以及預測市盈率十倍計，合理目標價為4元，止蝕位2.45元。

戰報

聯邦制藥（03933）

史提芬周一推介聯邦制藥，股份尋日曾高見11.2元，以推介日低位10.06元計，幾日已賺逾11%。

JOYCE（00647）

May上周三睇中嘅JOYCE，無令人失望，尋日搶高至1.01元，以當日低位0.91元計，同樣有近11%盈利。