太子手記：恒大旅遊城開幕必墟冚
恒大地產（03333）一直都以「豪氣」見稱，今個星期六會為佢哋旗下喺廣東清遠嘅旅遊綜合項目－恒大世紀旅遊城舉行開幕典禮，淨係睇佢哋邀請嘅人物，可以用三個字形容「多、紅、勁」。
太子聽講，恒大請咗全國三百幾家媒體嘅記者去採訪，仲預留咗三粒鐘同大家「溝通」，似足馬拉松式會面呢！
體壇娛樂眾星捧場
清遠呢個項目，係華南區最大型旅遊綜合項目，入面有皇家園林、300多間房嘅酒店、飲食中心、娛樂中心、運動中心同埋足球基地，當日除咗由主席許家印講吓生意經之外，佢請咗好多藝壇紅星兼體育明星到場，實行閃到你爆。
有邊個咁閃呢？娛樂明星、歌星就包括有容祖兒、范冰冰、Twins。同運動有關嘅，有恒大女排嘅郎平、奧運會網球雙打冠軍孫甜甜、羽毛球世界冠軍謝杏芳等體育明星。
恒大清遠嘅旅遊城將開幕，主席許家印相信會出席。（資料圖片）