艾爾敦出山助滙豐攻中東
滙控(00005)老臣子艾爾敦(David Eldon)重出江湖?尋日滙豐宣布,喺○五年退休嘅David將出任中東滙豐非執行董事及主席。
曾任杜拜金管局高層
查實David自○六年開始,已經係杜拜國際金融中心管理局嘅非執行主席。滙控行政總裁歐智華都大讚David喺中東同北非有深厚經驗,有佢出任中東滙豐主席一職,絕對係滙豐嘅榮幸。
對今次David出山一啲都唔意外,因為年齡同工作能力無直接關聯,既然滙豐想喺中東嘅新興市場大展拳腳,以David嘅輩分人望正好適合;加上中東多酋長國,做生意要講人脈,有David坐鎮總好過空降人生路不熟嘅管理層。David退休前係滙豐喺中東地區嘅重臣,擔任過滙豐亞太區主席、恒生(00011)主席等重要職務。