蔡耀君入交行任非執董
尋日五大內銀排隊一齊公布業績之際，原來亦有新嘅人事任命公布。交行（03328）就宣布委任前金管局副總裁蔡耀君擔任獨立非執董。太子諗起，應該係繼任志剛後第二位前金管局要員獲內銀任命。昔日香港財金界其餘三大巨頭周文耀、梁錦松及馬時亨，分別坐鎮內地五大行。
財金猛人紛坐鎮內銀
其實，早喺○五年，工行（01398）率先委任前財政司司長梁錦松擔任獨立董事，協助工行嚟港上市。到去年，中行（03988）及建行（00939）委任港交所（00388）前行政總裁周文耀及金管局前總裁任志剛擔任獨立非執董。
及至上周，農行（01288）委任前商務及經濟發展局局長馬時亨任獨立非執董，加上今次交行委任蔡耀君，昔日香港財金界官員真係紛紛投向內地五大行。
雖然佢哋所擔任嘅都係啲非決策職務，但佢哋以往喺金融監管機構、政府部門所累積嘅經驗，兼且又具國際視野，相信五大行看中這點而予以委任。