利豐睇中法國名鞋商

近年利豐（00494）密密收購，特別係時裝、手袋同鞋，全部都係國際名牌，又同國際明星珍妮花露柏絲（Jennifer Lopez）合作推自家品牌產品，今次利豐大股東馮氏兄弟旗下基金就出手，競投法國製鞋設計師Robert Clergerie旗下嘅公司。

夥法資競投添勝算

太子聽朋友講，Robert Clergerie呢位製鞋設計師喺歐洲響噹噹，聽聞公司每年生產超過10萬雙鞋，所以今次出售，吸引唔少國際品牌出價，包括西班牙著名時裝商Puig，而馮氏兄弟為咗增加勝算，就夥拍一名法國人競爭呢間公司。

利豐近年頻頻收購，包括英國成衣供應商Visage Group、美國鞋履設計商Jimlar Corporation等，舊年佢哋仲同Star Branding成立創製品味生活嘅公司，為產品注入潮流文化，又為音樂、娛樂同體育名人界，尋找開發時裝嘅人才等，相信利豐喺不久將來，發展成為「百足咁多爪」嘅公司。