四太心無旁騖搞好澳博
四太梁安琪尋日捧佢姊妹朱太（朱李月華）嘅場，無論佢去到邊，都畀人問到賭王健康狀況。唔知係咪答到有啲悶，太子見四太都唔想直接答，佢話大家睇到賭王早前出席日本賑災活動嘅情景，就知佢身體幾好啦。
最緊要股價上升
早前各房爭奪嘅Lanceford股權分布，四太就話最緊要了解自己間公司（澳博），「其他嘢了解嚟做咩？唔關我事嘛，我好唔得閒o架，最緊要做好自己啲嘢」，「最緊要我哋股票係咪節節上升」，轉頭即刻走咗去問澳博股價收幾多。
四太都透露澳博路氹城項目做緊，希望申請可以盡快獲批。澳博舊年市場佔有率有成35%，四太都覺得競爭好激烈，佢謙稱話保持到三成就已經好滿意。澳博股價自從Lanceford股權分布清晰咗之後，股價已拾級而上，上個禮拜仲創過新高。
四太梁安琪關心澳博業務發展。