太子手記：嘉能可派花紅等到老

據傳將於月底展開喺倫敦及香港集資額達100億美元嘅上市計劃嘅全球最大商品交易商嘉能可（Glencore），一舉一動備受關注，英國傳媒尋日突然傳出，嘉能可嘅高級職員去年共獲逾9.38億美元（約73.1億港元）花紅！

咁大件事，嘉能可即刻解畫，話呢9億美元其實只係員工多年來辛苦累積所獲嘅獎勵，而且員工要做到退休先有機會獲發有關獎金，呢班員工聽到唔知算唔算空歡喜一場呢？

累計退休獎勵73億

呢個咁烏龍嘅消息，相信出於外界對嘉能可財務數據有誤解，事關英國媒體引述嘉能可債券持有人話，嘉能可約60名高層員工，去年基本薪酬共約1.46億美元，不過佢哋亦另有9.38億美元嘅花紅。如果照報道咁計，嘉能可這批高層嘅人工，分分鐘拍得住華爾街大行。

所以報道一出街，嘉能可就急急解畫，話報道所引述嘅數字，其實係代表這批員工在公司工作多年，所累計嘅退休獎勵，亦即係話有關員工一定要到退休先有機會獲分享成果！