股海實戰：洛陽鉬業發A股有支持

眨眼又過咗一季，期間港股表現乏善足陳，一切與錢有關，資金流走未見回頭。不過，外圍市況持續偏穩，日本大地震嘅出現，加快測試出港股底部支持，故阿莊對次季股市表現不太悲觀。

上月組合買入嘅恒地（00012），喺大股東多次增持下，股價持續走強，尋日曾高見54.25元，收報53.9元，升1.99%，繼續安坐順風車。水泥股板塊依然人氣旺盛，近日表現相對落後嘅華潤水泥（01313），尋日創出新高7.75元，收報7.71元，升4.4%。此外，阿莊手持嘅上實城市開發（00563）亦見異動，升8.8%，收報2.72元，既已上足子彈，欠嘅就係一陣東風！

有消息指，鄭裕彤家族旗下周大福集團擬安排周大福珠寶在港上市，意向集資額高達20億至30億美元，規模龐大，估計月內或會定出保薦人。目前可供估值參考嘅，係已上市嘅周生生（00116），市值117億元，往績市盈率約十五倍。以周大福喺中、港兩地嘅分行規模，若然市況利好，閒閒哋可以用市盈率二十倍招股，一切順利，料於下半年登陸港股，次季倒可留意潛在影子股周生生嘅表現。

中資股方面，中通服（00552）宣布去年盈利增13%至18億元人民幣，業績表現冇咩驚喜，冷不防公司同時宣布十供四，估計集資額不多於60億元人民幣，將作為於海內外業務發展及策略資產收購與合資在內之用。供股消息出乎意料，尋日公司股價一度質低至4.58元，收報4.73元，跌15.54%。

中通服現價往績市盈率12.7倍，以其每年約一成半嘅盈利增長，預測市盈率約十一倍，撇除潛在購併因素，估值不是特別吸引，加上供股需時完成，尋日大陰燭過後，反彈力度未必太大，都係作壁上觀為妙。

康師傅加價碰壁

正當中央政府高度關注通脹問題，必需品零售商提出加價申請嘅舉動，自然成為市場焦點。喺發改委嘅關注下，聯合利華及康師傅（00322）尋日均宣布，決定暫緩實施價格調整計劃。加價先鋒竟碰上一面灰，睇怕短期都唔會再有同業冒險闖關，最快要到第三季，等通脹數據穩定，先至有機會再提出調整建議，呢個因素亦變相限制咗相關股份嘅短期表現。

講到如何對抗通脹，買些少商品股傍身係可行辦法。主要從事銷售鉬鐵、鎢精礦及貴金屬等業務嘅洛陽鉬業（03993），去年賺9.65億元人民幣，增長達91%，表現理想。綜觀今年以來，國際鉬鐵價格上升逾一成，內地鉬精礦價格則升半成，估計今年鉬精礦價格升幅介乎15至20%，公司盈利前景可睇好。

另外，洛鉬正推進發行A股計劃，集資有助加快核心業務發展，加上A股對同類股估值較高，有利H股表現。再睇近日其H股成交增加，股價已收復10日線，若能重上7元樓上，可確認再次起步，中線睇8元，止蝕位定於6.35元。

戰報

中星集團（00055）

錢進上周五話中星集團有力挑戰高位，尋日炒高至0.465元，較推介日低位0.375元足足升24%。

中國建材（03323）

中國建材連日向上攀升，尋日再創新高29.8元，較Sammi周三推介時低位26.45元累升逾12%。