國美孫一丁將離職？
國美電器（00493）星期一公布業績，管理層會出嚟講吓成績表、未來大計，之不過，公司冇講明邊啲管理層會出現，除咗張大中接替陳曉做主席之外，市場好關心仲有冇管理層會因為一朝天子一朝臣而需要變動，過去一個月，呢啲消息冇停過，無論公司點澄清都好，尋日又再傳出執行董事孫一丁已經搞緊離職手續，講到似層層。
傳冇返工兩星期
國美發言人早前以「公司嘅高級管理人員對公司成長與發展懷有深厚的感情」，嚟否定公司再有人事變動。尋日內地嘅傳媒《21世紀經濟報道》引述國美內部人士話，雖然國美電器今個月九日嘅公告，確認原執行董事孫一丁將保留執行副總裁職位，但係喺十日開始，孫一丁已經冇返國美上班，近期已經開始辦理離職手續，佢負責嘅連鎖網絡拓展業務已改由副總裁牟貴先兼管。