期指攻略：續持好倉博CPI急降

近兩日，投行賓架之間流傳，周五早上十時公布的中國二月份CPI數字，可能遠低過預期，有機會由一月份的4.8%回落到接近4%水平。當然，筆者無水晶球，都同大家一樣要聽日至知，但觀乎港股近兩個交易日的表現，有春江鴨偷步入市絕對唔奇。

假如內地通脹危機真係在意想不到之下無咗，去年十一月開始，擔心人行落藥過猛，大大落後於外圍的港股，來一次大幅向上修正的機會是存在的，尤其是幾隻重磅內銀股的預測市盈率，大都貼近歷史下限。一旦市場進行一次大規模重估，筆者相信，恒指中線目標，絕非24,000點或者25,000點咁簡單。

講番尋日市況，基本上期指高開80點後，全日波幅唔大，早市一見高位23,903點，基於距離24,040點的真正阻力已不遠，外圍又缺乏較大利好消息配合，好友明顯放軟手腳，任由即市調整出現。午後中移（00941）一度倒跌，拖累期指最低回試23,743點，收市貼實低位，報23,760點，較現貨低水50點，考慮到除息因素，期指回復到合理的低水幅度。基本上，在23,350點揸的好倉，暫時可以繼續周初的策略，視23,965點為短期目標，止賺位訂23,440點。