股海實戰：中信資源轉強可跟進

外圍股市前晚高收，加上內地滬綜指重上3,000點收市，港股升勢停不了，恒指收報23,810點，升98點。若然手頭持貨多，阿莊傾向喺24,000點或樓上開始減倉，或者開些少衍生工具淡倉買個保險。

前晚越南國家銀行宣布將再融資利率由11%上調至12%，對上一次調整係二月十七日，由9%上調至11%。密密出手，反映當地政府對付惡性通脹嘅威脅絕不手軟。但老實講，咁樣加息法，勢必影響經濟發展，如何平衡經濟增長與通脹問題，乃當今亞洲各國政府嘅一大挑戰！

針對近期內地升市，有指主要係人行暫時放軟手腳，市場水源壓力稍緩，部分重投股市，故見農曆新年以來A股交投明顯增加。至於港股，阿莊始終認為，樓價亢奮式上升，已去到一個令人不安嘅地步，加上投資者對息魔有所顧忌，除非北水大量流入煲起港股，否則股市升極有個譜。

除此之外，近期香港政治處多事之秋，執筆時傳來立法會否決向政府批出602億元嘅臨時撥款。查實開會前夠唔夠票班官員應該心裏有數，搞成呢個爛攤子，香港人只有頭擰擰，冇眼睇！要知道，安居樂業、和諧社會係香港繁榮穩定嘅重要基礎，政治風險溢價上升，對港股不利。

回說個股表現，喺香港及內地從事便利店及食品業務嘅利亞零售（08052），去年賺1.36億元，增長50.8%，每股盈利18.67仙，末期息每股8.5仙，計及中期及特別股息，全年派息每股12.8仙，公司已申請轉往主板掛牌。

利亞股價坐4望5

查實利亞自○一年上市以來表現良好，早已具備轉往主板掛牌嘅條件，到咗今年終於動手，係咪嚟緊有咩重大發展計劃，希望轉往主板掛牌改善流通量，以備融資需要，不得而知，但觀其截至去年底手頭現金逾6億銀，兼冇銀行借貸，應付現有業務應該綽綽有餘，但若然要大搞內地市場，咁就唔同講法！

屈指一算，利亞現價往績市盈率降至十六倍，4厘息，香港業務發展穩定，廣州業務正朝收支平衡嘅目標發展，論估值確有吸引力。只係呢隻股成交唔多，買貨要有耐性，相信成功轉板有助改善交投及估值，合理價坐4望5。

此外，國際油價近日雖有回吐，但紐約期油仍企穩每桶100美元樓上，油股股價反覆做好。中石油（00857）現價離五十二周高位不遠，中海油（00883）亦已由上月低位反彈16%。兼營鋁業、煤業及石油業務嘅中信資源（01205），月初以來股價開始慢火煎魚，尋日見真章，大成交衝上250日線1.76元，全日高位1.77元，收報1.71元，升幅6.8%，成交6,717萬元。集團昨晚發盈喜，難怪股價先行異動。

走勢上尋日一支大陽燭已成功扭轉自去年十月嘅下降軌，下兩個目標分別係年初高位1.86元及2元關，1.6元止蝕。

戰報

好孩子（01086）

姚午齊上周五話好孩子有力重上水面，尋日高見5.37元，距離當日低位4.64元足足累升近16%。

鴻寶資源（01131）

錢進周二揀咗隻鴻寶資源，跟佢於當日低位1.22元上車，尋日升抵1.4元高位，跟到足可賺近15%。