首富宗慶后日用130蚊
唔少富豪都寧願過簡樸嘅生活，但慳家慳到好似內地首富宗慶后咁，一年用唔到5萬元（人民幣．下同）真係少見。有人話佢因慳致富，亦都有人話佢因為太忙無時間使錢。
每日7至11 年終無休
去年登上《福布斯》中國富豪榜首位嘅宗慶后，佢每朝七點鐘返工，夜晚十一點先肯放工，年終無休，農曆新年照開工。佢喺杭州總部嘅總經理室就放咗一張床，準備佢隨時做通宵要喺公司過夜。
唔嗜賭、唔豪飲、唔打Golf，如果唔使出差或外出見分銷商，食飯只會幫襯公司飯堂，宗慶后每日個人支出用唔到130元，一年支出少過5萬元。
佢接受《彭博社》訪問時就話，賺錢令到佢覺得人生有價值。認識佢嘅人就話，宗慶后經常會留意每一項支出，連買一把掃把都要知幾多錢，令到公司的成本控制得好好。
宗慶后話自己每日支出唔使百三元人民幣。（資料圖片）