太子手記：梁高美懿願男女CEO平等

今日係國際婦女節100周年。恒生（00011）CEO梁高美懿（梁太）講咗一段好切合女性嘅故事。話說二十多年前，女兒剛出生，產假放咗五個半月，看着腹中人兒變成會笑會哭嘅娃娃，一度想過放棄工作，留在家中做「湊仔婆」，結果在朝夕「餵奶」、換尿片日子裏，發覺難過做行政人員。可想而知，家中嘅老婆、阿媽至係社會棟樑。

梁太自認係幸運兒，不是綁着揹帶，一邊照顧小孩、一邊彎着身車衣那種女工，但喺八五年滙豐派佢去澳洲工作嗰幾年，都經歷咗很大掙扎，最後決定「一拖二」，把兩名女兒都帶到澳洲。梁太話「如果當年繼續留在家裏，今天的我會怎樣了？」

三八婦女節冀和諧共融

佢係滙豐首位華人女總經理，仲係全港恒指成分股公司第一個以及唯一一位女CEO。梁太但願日後再無「男CEO」和「女CEO」之分，重要崗位有能者居之。

唔好以為女人喺三八婦女節就惡晒，學梁太話齋，男女各有長短處，男士嘅能力及對社會嘅貢獻應予以肯定，若兩性之間能互相配合，發揮團隊精神，無論在家庭或事業上，定能加倍成功，所以佢想趁機同班姊妹致敬之餘，仲希望大家以後不分性別，真正做到「和諧共融」。