Fundman睇市：保險股博反彈唔預國壽

兔年港股跌足三日，認真大吉利是，人民銀行前日傍晚宣布加息四分之一厘，儘管內地加息預咗只係遲早的問題，但淡靜市況下，跌市實在唔使搵理由，尋日恒指第三日插水，再跌320點，收報23,164點，假如初五港股重開當日揸張期指，三日已經輸咗近千點，基金經理要錢唔要貨，而重磅的內銀股，主導大市跌勢。美銀美林估計，今次加息會令內銀股淨息差收窄1個基點，純利則減少1%左右，不過美林估今年仲有兩次加息機會，內銀股短期都難免被息差收窄的壓力影響。

未來幾日，市場焦點應集中在下星期二，中國公布的一月份CPI數字身上，綜合大行預測會升至5.4%，超越去年十一月高位5.1%，分析員預測今次CPI高位大有可能在6%樓上，意味着二、三月人行大條道理繼續加息，以扭轉目前負利率的情況。

對於加息，投資者第一個反應，係對需要借貸企業不利，皆因要畀多一點利息，意味着營運成本增加。相反，對於淨持現金的公司，或者揸住投保人大筆現金，投資在短期債券及定期存款的保險企業有着數，投資回報會因此上升。昨日內地保險股，是少數逆市奇葩，中國平安（02318）、中國財險（02328）及中國太平（00966）通通錄得升幅，可是要留意，上述保險股均從午市高位回落不少，巨無霸國壽（02628）更倒跌收場，反映基金經理視加息為逃生機會，非入市時機。

回顧內地去年公布十一月份CPI升至5.1%，遠超估計的4.7%，之後人民幣加息預期全面升溫。不過，加息對保險股有利的傳統智慧，今次似乎行唔通，回顧期間平保跌13.3%、財險跌12%、國壽跌9.6%，因為短債及存款比例最高，被視為最能受惠加息的太平，也要跌8.8%，期間恒指及國指分別係無升跌及下跌3%，可見保險股近期確係大落後。

加息因素已作反映

形成這現象，筆者認為同○九年保險股升浪中，過分透支A股復甦、息口上升令利息收入水漲船高的因素有關。另外，A股及內銀股近期處歷史估值下限，分別在平均10倍及12.5倍水平，對市盈率向來「高企」的保險股不利，由彭博資訊綜合分析員預測，財險一一年市盈率15.5倍，國壽17.5倍，平保21.7倍，太平更是23倍。

當然，如果認定A股離底不遠，博熱情的投資者，再一次憧憬來自股市的投資回報大豐收，部分保險股還是可以趁低收集，筆者較看好平保及太平，反而，國壽近期低於同業保費收入升幅，令人擔心即使反彈，股價升勢也會遜於其他同業。