Fundman睇市：騰訊賺錢能力超想像

美股隔晚又升過百點，可惜同港股冇關係！恒指連續四日都高開低走，陰陽燭出現四隻烏鴉，大市再跌12點，報23,788點，穿10日線之後，差些少連20日線23,774點都穿埋，個市成交縮到得627億元。

作為股評人，遇上這種奄悶市況認真「攞命」，基金愛股揀唔落，只怕一單壞消息，個個悶到發慌的芬佬齊齊按掣玩洗倉遊戲，萬一做咗霸王（01338）二號就無謂；搵落後股？數來數去離唔開內房與內銀股，可惜缸邊吹風，仲言之鑿鑿話上海已申請開徵物業稅，內容大致係人均面積60平方米以上要徵4%，內房股氣氛涼咗一截。

內銀股暫未宜撈底

內地銀監會統計數字話，內地商業銀行去年第四季的不良貸款比率進一步回落，去到1.14%，乃海嘯後新低，按季跌1.4%，不良貸款餘額跌至4,290億元人民幣，撥備覆蓋率就升至218.3%。可惜係，內銀股完全無運行，陰陰乾底下，三大藍籌內銀股一一年市盈率只係7.5至8.5倍，平到得人驚，皆因賓架都預咗去年第四季數據未見真章之外，大型銀行比較中小銀行，問題可能會滯後一兩季先浮現，亦擔心中央緊縮政策，極有可能超額完成，令內銀面對不良貸款大幅回升，撥備覆蓋率回落的風險。目前內銀股估值，應該已經將上述兩大不明朗因素反映得七七八八，可是一日通脹未見頂，緊縮政策仲層出不窮，內銀股要大報復亦唔容易。

內地網絡遊戲商騰訊（00700），股價昨日逆市勁升9元，報199.1元。事緣內地傳媒報道，騰訊準備成立騰訊產業共贏基金，規模50億元（人民幣．下同），針對網絡遊戲、社交網路、無線互聯網、電子商務和新媒體等領域投資，目標在兩至三年內，為首期50億元找到投資機會，公司也不排除引入其他投資者的可能性。相信，這50億元都未真係全部由騰訊拎出嚟，但騰訊市值一日已經暴漲165億港元，這個消息的「投資」，一日翻三番。

涉足創投皆因錢多

50億元人民幣，等於騰訊市值唔到2%（昨日市值3,656億港元），或者第三季資產淨值兩成九，雖然唔算小數目，但事實騰訊現金流也相當驚人，去年首三季營運活動現金流入85.6億元，計及投資及融資活動後，淨現金流入16.8億元，手頭定期、受限制現金及現金等值資產達184億元，再和去年同期相比，騰訊短債及可供出售短期投資明顯增加，直覺覺得，提高財務槓桿若非公司諗法子以保持過往增長勢頭，就好有機會真係錢多「身痕」。

一向好怕上市公司，因為流動現金太多，要搵新出路而進行業務多元化。多年來，玩具起家搞地產，做公路基建變成內房股，管理層自視過高玩跨行業轉型等例子屢見不鮮，結果唔少都係衰收尾收場。

事實上，要揀科網行業創投基金，市面上大把選擇，但既然騰訊開宗明義，只針對網絡遊戲、社交網路等對象，還望未來收購會同本業有關，產生到一定協同作用，最令人覺得難搞的，仲係這間虛擬世界賺大錢的中國網絡一哥，到底值幾多錢。睇番○七至○九年盈利平均增長70%，估值介乎二十至七十倍市盈率，基數大咗，一○至一二年盈利預測增長率大約降至41%，粗略打個折，未來兩年估值可能介乎11.7至41倍，意味着今年股價區間可以介乎83至292港元，明年則係111.1至389港元，這令筆者想起股神巴菲特金句：自己唔識嘅行業，最好唔好沾手。