股海實戰： 金威啤酒值博率高

美股前晚係威係勢，三大股指全線高收，道指更逼近12,000點關，帶動亞太區股市尋日高開，日經平均指數升1.1%收場，恒指亦一度逼近24,000點，可惜一再喺此位遇阻回落，午後內地股市低收，拖累恒指埋單倒跌12點，報23,788點，大市成交627億元，高開低收反映觀望氣氛甚濃，市場缺乏承接。

本來可能係兔年首隻大型新股嘅宏橋（01378），原定喺尋日召開記者會公布上市計劃詳情，誰知臨時取消，聽講理由係程序安排上出現問題，未知原定喺二月十一日掛牌嘅日期會否受到有關問題影響。

「胡奧會」已完結，中美雙方除咗簽署一系列貿易合作協議，還一如外界預期，就能源方面加強合作，重點包括清潔能源及可再生能源範疇，其中中國國電集團公司與美國風電企業UPC簽署《風電領域戰略合作框架協議》，雙方將共同開發、建設及運營七個規劃裝機總容量超過1,075兆瓦嘅風電項目，總投資逾100億元人民幣。

咁啱得咁蹺，阿莊前日睇到一份由中信集團旗下嘅上市公司事安（00378）發出嘅通告，內容披露公司認購UPC中國優先股，涉及投資額3,900萬元，完成後相等於持有UPC中國經擴大已發行股本嘅1.92%。據傳媒報道，去年UPC中國已覓得私募基金Global Environment Fund投資。今次一家唔起眼、市值僅6億銀嘅二、三線股竟然有份參與投資呢個項目，顯然係同其控股股東背景有關，可惜此股街貨極為有限，交投疏落，股價未能反映業務發展。

業務步入收成期

繼續睇吓紅籌股，金威啤酒（00124）就去年度業績發出盈喜，預計綜合除稅後溢利將按年顯著增長。其實，阿莊過去亦曾分析過金威，指近幾年公司積極擴充產能，並走出廣東市場，進軍天津、西安及成都等地，雖然一度因為要應付資本性開支而進行供股，而且業績由盈轉虧，但○九年度公司經已成功扭轉虧損局面，是次盈喜更反映公司開始步入收成期。

事實上，內地啤酒市場愈來愈歸邊，青啤（00168）及華潤旗下嘅雪花啤酒雙雄稱霸，大家都鬥快以購併來擴大版圖，先後收購山西及山東啤酒廠嘅青啤就係好例子。不過，如今可供兩大購併嘅目標已經唔多，金威喺廣東市場具知名度，業務又已重拾正軌，唔難成為兩大龍頭虎視眈眈嘅購併對象！

目前青啤嘅市帳率係5.4倍，雪花啤酒未有獨立分拆上市，故青啤仍然係內地最大嘅上市啤酒企業。至於金威，雖然受盈喜消息刺激，尋日股價升4.7%，收報1.97元，但市帳率才1.1倍，保守地用市帳率兩倍計，每股都值3.4元，NAV1.7元具支持，值博率高，只係交投唔算十分活躍，可能要考吓閣下耐性！

戰報

A8電媒（00800）

姚午齊本周一叫大家吼實隻A8電媒，昨日股價最高升抵3.23元，較推介時的低位2.9元，有11%的升幅，都算和味。

比亞迪電子（00285）

阿May上周二追蹤隻比亞迪電子，股份穩步向上，昨日高見5.36元，較推介當日低位4.89元有約一成進帳。