網景創辦人轟高盛掠水
社交網站Facebook早前安排配股，唔少投資者爭住「入飛」，原來曾經叱咤一時嘅互聯網企業網景（Netscape），其創辦人克拉克（Jim Clark）同樣收到高盛電郵問佢對批貨有冇興趣，克拉克最終冇「入飛」，仲大爆話高盛食水深。克拉克近日接受《彭博市場》雜誌訪問講起仲好勞氣，佢話高盛要收客戶4%配售費、0.5%「開支儲備費」，將來賺到錢仲要分5%利潤畀高盛。
叫買Fb收費貴
佢認為咁嘅收費唔合理，話自己其實啱啱幾個月前已經由另一間行買到Facebook股份，價錢較低之餘亦唔使分紅畀經紀。
克拉克仲話，佢交畀高盛代為投資嘅4億美金，當中大部分早喺○九年六月已經提走咗，原因係高盛嘅投資表現同意見都太差。
網景創辦人克拉克轟高盛配售Fb食水深。（資料圖片）