Fundman睇市：運動用品業競爭白熱化

前日港股一反彈就超過300點，預咗港股唔容易再威多一日，結果尋日十二月期指結算日，港股係有波幅無升幅，悶局收場，恒指收市報22,999點，升30點。

特區政府針對炒樓落重藥已經六個星期，從經紀行所提供數據，炒家失蹤，樓市交投量的確跌咗，但息口實在太低，揸樓的也不急於放盤，最後形成樓價跌唔落的情況，加埋大行普遍睇好明年商廈及寫字樓租金仲有一成到一成半升幅，個別地產及收租股明顯炒落後，信置（00083）升0.24元，報14.66元，希慎（00014）創五十二周新高見37.55元，筆者估計，九倉（00004）同領匯（00823）等，短期再挑戰高位機會唔細。

瑞銀出咗份A股策略研究報告，指出最近內地資金緊絀情況，與六月相比有過之而無不及，一來受存款準備金率上調，凍結流動性效果影響，另外的理由仲包括商業銀行年底埋單、息口上調效果，以及財政存款遲遲未到位，加劇流動性緊張的預期。瑞銀估計上述情況明年會陸續有改善，尤其人行在春節前一般會有較寬鬆的投放，第一季A股值得睇好，相信最早反彈、彈力最強的板塊包括醫保、技術硬件設備、家庭及個人用品、食品及零售等等。且看內地股市若然氣氛好轉，能否對港股帶來沖喜的作用。

李寧成洗倉對象

最近李寧（02331）被基金洗倉，講來講去，一間歷史市盈率可以去到三、四十倍的公司，投資者對業績期望肯定成正比，業績可犯錯空間極細，一份季度報表或者一個交易會接單唔理想，隨時足以引發災難。

有位賓架朋友認為，市場對「基金股」前景產生幻覺，同近年私募基金錢太多不無關係。私募基金運作上有別於傳統基金，管理人藉注入資本，換取未上市公司股權，更甚是幫手改善管理，湊大後上市套現。

近年歐美股市不濟，大量熱錢見股市搵食難，轉飯鑊向私募基金埋手，但說到底，私募基金管理者都係凡人一個，同普通股票基金一樣，每每一窩蜂投入相同產業（唔多唔少同好向客戶交代有關），在大量資金湧入下，這些被私募基金看中的公司，不難透過擴大業務規模交出前景秀麗的圖畫，但隨着市場競爭白熱化，投入資源與回報的比例每每會下降，直到市場飽和，出現汰弱留強，兩三年前的運動內需股，以至今時今日的光伏及可再生能源股，都有機會經歷像李寧般的下場。

寶勝表現唔失禮

李寧今年股價累積跌43.6%，年初以為內需概念實掂嘅，上咗昂貴一課。安踏（02020）好啲，升7.1%，反而一些唔起眼，規模相對細，並不覆蓋全國市場，甚至只專攻二三四五線城市的，表現還算合格，像寶勝（03813）升12.9%，361度（01361）升22.6%，或者，在運動用品這種開始進入高度競爭階段的行業，一些經營較佳的大衛，若能找到適當的市場定位，都有戰勝巨人歌利亞的可能，至少在未來兩至三年，這個機會都未能抹煞。