股海實戰： 興達國際開闢新財路

恒指昨日早段上過23,111點後回軟，收報22,999點，升30點。阿莊與不少機構投資者傾過，他們認為今年十二月夾雜好多特殊因素，市況不能作準，並對一一年展望普遍審慎樂觀。如此看來，待明年一、二月基金完成部署新倉位，三月藍籌業績公布前後，市況相信便會明朗化。

阿莊嘅投資組合○四年以100萬元起家，到依家增值至800多萬元，「晒士」愈大，要保持年年增長愈來愈唔容易，粗略估計今年組合市值增幅約16%，表現總算跑贏恒指。今年佳作包括田生集團（00183）、中國南車（01766）等，但條氣最唔順嘅係隻中國燃氣（00384），未知幾時可以復牌，呢個例子再次說明，國企始終比民企股穩陣。

昨見報道指，有缸邊股民見指數升自己隻股唔升，激動過頭就咁去咗，令人惋惜。查實股票價格有升有跌係正常不過，阿莊炒股多年，都好明白日日喺金魚缸短炒，心理壓力較大，但畢竟指數高低與股價升跌非股民可決定，故只有因應本身情況，量力而為。

十一月份本地零售額同比增長17.9%，主要受惠旅遊業及就業市場表現良好。誠如昨日阿莊所言，早前零售股經已透支咗一定升幅，嚟緊主要係炒上落。零售股中，阿莊留意咗隻英皇鐘錶珠寶（00887），昨日曾高見1.13元，收報1.12元，升4.67%，短線若企穩1.15元樓上，可再衝1.2至1.3元阻力位。

異動股方面，午後見有買盤掃上興達國際（01899），全日高位見8.5元，收報8.32元，升3.1%，成交1,286萬元。

受惠汽車業逐步復甦

興達主要從事製銷子午輪胎鋼簾線及胎圈鋼絲等產品，受惠去年下半年開始內地公路運輸及汽車業逐步復甦，興達受益不淺，已公布今年上半年收益同比增長66.3%，至25.38億元人民幣，加上一月出售風神輪胎A股獲益1.86億元人民幣，故半年純利大增1.37倍，至4.76億元。不過，公司未有派發中期息，九月初更透過花旗按每股5.5元配股集資7.4億元，用作提升生產設施、開發新產品嘅融資及一般營運資金。

今年，興達成功研發一種名為切割鋼絲嘅新產品，適用於切割堅硬而易碎嘅物料，並廣泛應用於太陽能電池業以切割多晶硅棒成為晶圓，而目前公司超過一半現有生產設施適用於製造此新產品，估計待明年開始大量生產。阿莊認為，興達嘅資金用得其所，嚟緊嘅新產品不單能為公司建立一個新嘅盈利增長點，更有助拓展客戶至汽車以外嘅其他高增長行業，令收益來源多元化。

以興達現價計，今年預測市盈率約十五倍，待明年新產品投產，預測市盈率可進一步下降，估值具上調空間，暫看向上主要阻力喺五十二周高位9.1元，向下支持在7.75元，不妨留意。

戰報

本月十五日冼金基推介中國稀土時，低位只有3.12元，昨日股價高見3.85元，累計升幅超過23%，眼光真獨到。

光匯石油（00933）

錢進周二推介的光匯石油，昨日持續做好，並高見4.08元，以推介當日低位3.75元計，累計升幅接近9%。

\