投資大師被貶洋黑嘴
股壇有明燈，內地傳媒就幫財經界選咗一班「黑嘴」出來，由於上榜嘅係國際級投資大師，所以佢哋叫「洋黑嘴」。
投資大師經常發表對市場睇法，但散戶若然跟，分分鐘蝕到入肉。《證券時報》就搵咗幾個例子出來，整咗個「洋黑嘴」榜，羅傑斯、巴菲特、魯比尼、索羅斯都榜上有名。
大師測市未必準
「商品大王」羅傑斯三月話英鎊可能幾周就崩潰，但其後幾周就反彈500點子；索羅斯就睇淡歐元，點知後來歐元反彈，佢就反口話歐元唔會消失，最過分嘅係，佢話「黃金是終極泡沫」，但佢持有全球最大嘅黃金ETF470萬股，係投資組合最重倉。
巴菲特話睇好比亞迪（01211），但之後股價受累銷售量問題而股價急跌，巴菲特8元入股，點都係賺。末日博士魯比尼啱啱話國房地產市場會再次觸底，幾日後，就靜雞雞入咗套豪宅，難免被人質疑黑嘴。