換樓客驟減慘過無炒家

政府出手打壓樓市，已經有兩個禮拜，但係對樓市嘅震盪睇嚟都仲未完，究竟會持續到幾時，亦都係未知之數。

上個禮拜，Paul少就趁得閒，約咗「周董」一齊食飯，順便跟佢參觀吓啲減價「鎖匙盤」。睇咗一個上晝，驟眼睇「災情」並唔係大家想像中咁嚴重，見周董間行，啲同事都約到唔少客嚟睇樓，心諗今個周六及周日，成交應該都可以回升番些少。

聖誕歲晚恐拍烏蠅

但周董就話情況唔係咁樂觀。雖然呢一轉，仲可以用啲減價炒家盤引吓啲人出嚟睇樓，零零星星咁都有啲生意做吓，之不過到咗聖誕同埋農曆新年前後嘅傳統淡季，就恐怕連呢啲零星嘅成交都未必有，尤其係換樓客，好多都疊埋心水過節，如果市場冇乜特別嘅推動力，佢哋實行「歎慢板」。另一方面，啲冇實力嘅炒家畀人「震倉」之後，市場嘅盤源，都會係一啲本身住緊嘅「住家盤」，或者係大戶投資者手上嘅貨，喺目前嘅經濟環境下，根本冇乜理由可以叫佢哋再減價，最終導致買賣兩閒，班代理就個個坐晒喺度。

新稅窒礙換樓步伐

事實上，樓市喺一夜之間冇晒炒家入市，放眼未來半年，就要靠班換樓客同埋內地豪客支撐住。好多大型屋苑，換樓客源往往都超過半數，如果換樓客唔肯入市，其實仲慘過唔見咗批大炒家。偏偏今次政府出辣招，除咗滅絕炒家之外，亦都進一步減低咗換樓客源嘅流動性。Paul少此話何解？好簡單，皆因喺經濟好，樓市處於上升勢態嘅時候，換樓活動就自然好頻繁，持有嘅年期亦都會比較短。但係依家好多喺呢一、兩年上車嘅用家，就算層樓升值咗，但礙於新稅項問題，都唔能夠短期就換樓，於是「焗住」要住多一排，但之後市況會係點？做按揭仲有冇咁低息？又有排諗。

正如周董話，今次政府出招，除咗打壓啲炒家之外，亦都趕絕啲上咗車冇耐，又「心思思」想換樓嘅用家，變相唔畀佢哋換樓好似換手機咁快。Paul少就忽發奇想，既然政府咁鍾意干預市場，不如整個「手機trade in印花稅」，變相禁制埋啲小市民，唔畀佢哋兩年內換手機，話唔定可以壓抑到近排啲iPhone 4炒風，等小市民可以用政府期望嘅「合理價錢」買手機，又夠環保。