滙控主席交接無聲無息

要講今年銀行界嘅大新聞，相信滙控（00005）高層大執位必定入選。尋日葛霖就喺董事會後正式退任，由范智廉接任集團主席。

唔經唔覺，葛霖二十八年嘅滙豐生涯已經結束，不過唔代表佢會閒着，因為休息唔夠一個月，就會接任英國嘅貿易及投資大臣，第時話唔定會同范智廉有唔少交手機會。

仲記得九月嗰時滙控決定主席接班人選，謠言滿天飛之餘仲非常峰迴路轉，搞到日日當連續劇咁追；可能當時太震撼，今次主席交接相對低調，連埋駱耀文喺星期三履新副主席一職時，都聽唔到滙控有乜動作或者活動。

除咗葛霖同范智廉，滙控嘅人事調動仲牽涉到現任行政總裁紀勤嘅去留，well，大家都知個結局啦，就係五十出頭嘅歐智華，會遲啲做紀勤個位。滙控呢單嘢咁震撼，連《華爾街日報》日前都選咗歐智華同埋紀勤做今年嘅話題人物。

渣打冧莊最佳銀行

呢邊廂低調上任，嗰邊渣打（02888）就值得大事慶祝，點解呢？皆因渣打冧莊，成為「環球最佳銀行」，兩度鍊贏強敵滙豐囉！

太子知道，滙控自從前主席浦偉士以來，每逢新主席上任都有個傳統，就係送個刻有「The Buck Stops Here」木座畀新主席，意謂鼓勵繼任者不要拖拖拉拉，勇於背起責任。