期指攻略：調整料持續 23934有支持

跟很多人一樣，筆者都畀上周四、五兩日的市況呃咗。周四，內地公布通脹數字去到4.4%，超過市場預期，當日市場反應可算冷靜，股市不跌反升。直到周五，市場憂慮高通脹及樓價，最終將迫使中央落重藥，市場盛傳周末人行可能加息，A股重挫5.1%，恒指收市跌477點，報24,222點，10日線支持24,397點終於失守，連帶前一個星期留下的兩個上升裂口，24,732及24,345點，亦雙雙補回。

中港兩地股市都患上假期前恐懼症，但明顯反應過敏，相信唔少大孖沙係借勢搵藉口鎖定近月驚人利潤。惟恒指24,300至24,400的支持完全起唔到作用，技術上，短期市況較大機會繼續調整，以消化九月初至今的龐大升幅，下一個重要支持位在23,934點。

由基本因素，美國QE2製造龐大信貸泡沫，湧入新興市場的局勢無變，但亞洲多國領袖就此表示關注，也令市場擔心區內加息周期會提早來臨，這肯定對短期股市氣氛不利。傾向睇好的筆者，周五早市按計劃試買，可惜午市24,400得而復失，惟有止蝕離場，尚幸早市大低開損失有限，筆者會堅持等機會再買，但今日決定會先作壁上觀，期指在24,150至24,440之間，好淡陣營應有一番鬥法。