股海實戰： 領匯可作跌市避風港

內地商品市場上周五急挫，連帶A股亦大散，滬綜指殺穿3,000點關，滬、深二市總成交金額超過5,300億元人民幣，直頭可以用「恐慌性拋售」來形容。

觸發大跌市，主要係市場關注十月份CPI同比增幅超過官方預期，或會促使人行再度加息以遏抑通脹，商品市場炒家見勢色唔對減倉，拖累A股創下今年以來嘅最大跌幅！

G20峰會已閉幕，宣言稱要避免貨幣競爭性貶值，矛頭直指美國。事實卻係，美國政府要刺激經濟，除咗開印鈔機之外，根本沒有太多選擇，大家都要接受現實。及早管理好本土通脹問題，乃目前各國政府首要應對嘅工作。

阿莊相信，由於通脹問題惡化足以影響社會穩定，故中央政府不會手軟，首先人行會繼續透過調高存款準備金率、息率及發行央行票據來吸收流動性，其次係調控內房市場嘅措施短期內無望「鬆手」，免得資產價格上升，進一步加重通脹壓力。市場流通性受到嚴格監控，加上中央政府取態強硬，相信足以叫熱錢收斂。

港股方面，上周五恒指受A股拖累，收報24,222點，跌477點，若非多家大行唱好地產股，令長實（00001）、新地（00016）及新世界發展（00017）股價逆市靠穩，恒指跌幅可能更大。

技術上，上周五恒指已失守10日線（24,397點），若短線未能重返其上，有機會回試23,800點水平支持。平心而論，十一月初以來港股升勢頗急，喺試圖抽穿25,000點前，先進行整固，唔一定係壞事，且先觀察今次市況調整幅度，再謀定而後動。

上周五阿莊見港交所（00388）季度業績優於預期，但股價尚未能升穿200元關，故短炒先行食胡，以平均價191元沽出5,000股，套現94.7萬元，獲利5.5萬元，睇睇可唔可以成功游一轉水。

受惠租金持續上調

若然閣下「畏高」，但又怕港元貶值唔想揸現金，阿莊認為領匯（00823）係唔錯嘅選擇。領匯最近宣布截至今年九月底止中期業績，期內收益26.21億元，同比增長7.5%，可分派收入11.72億元，增長11%，每基金單位中期分派52.86仙，增長9.3%。

由於截至明年三月底止的下半年內，領匯嘅零售物業中，按每月基本租金計算有12.8%租約將屆滿，以目前嘅地產市道，相信租金有上調空間，然則展望旗下零售物業整體續租租金向上，租用率穩中有升，以及資產提升項目完成下，收益將保持增長。

領匯上周五收報24.9元，逆市升0.1元。是次基金中期分派將於十二月一日除淨，可趁跌市留意24元下嘅上車機會。憑着坐擁4厘息率，又可享通脹環境下資產價格上升嘅機遇，不失為攻守兼備之選。

戰報

國中控股（00202）

志強上周四建議追入國中，周五逆市呈強，最高升過上1.04元，以推介當日低位0.94元計，累積升幅10.6%。

中國玻璃（03300）

中國玻璃上周五升至5.8元高位後雖隨大市回落，但以高位計，較阿莊本月八日推介日低位5.15元，升12.6%。