許家印還12億心情靚
唔經唔覺，已經嚟到十一月喇，早幾日（五日）就係內地房地產恒大地產上市一周年嘅日子。上市一周年，當然本身係一件值得高興嘅事。不過，相信好多人都記得，恒大主席許家印，舊年就為咗爭取支持，同美銀美林、淡馬錫同周大福等投資者訂咗個協議，喺今年五至十一月期間，恒大平均股價要維持喺3.5元以上，唔係許家印個人就要賠番12億畀呢啲投資者喇！
中央頻頻出手打壓樓市，一眾內房股嘅股價表現，自然唔係幾好睇，恒大都唔例外。對於呢件事，許家印就話，原來佢喺尋日一早，已經好準時咁，將嗰12億賠番畀啲投資者喇！
個人財政好健康
雖然佢拎咗12億出嚟，不過就尋日太子所見，許家印喺記者會度心情仲勁靚！有記者問許家印畀番12億出嚟之後，有無咩特別感覺，許家印仲笑笑口咁話，無肉痛嘅感覺，而佢個人方面，財政上依然都係咁健康。