太子手記：平保花3億培訓大手筆
員工係一間公司嘅寶貴資產，好似平保（02318）咁，佢哋用喺培訓嘅錢真係一啲都唔手軟，今年足足有成3.3億元（人民幣．下同），條數多過好多上市公司全年嘅盈利，唔怪得之佢哋嘅人均每月首年保費真係高過其他公司好多。不過，平安壽險培訓部總經理鄭文珍就話除咗培訓之外，產能高係建基於成個系統嘅效率。
鄭文珍話提供訓練，主要目的係希望可以減低代理人嘅流轉率，等佢哋可以做得定啲，每年金額就係由業務表現等決定。平保使喺培訓上面嘅錢就由○八年嘅1.57億元，增加到去年同埋今年嘅2.42億元及3.3億元。
培訓中心達97間
平保喺好多主要城市都有自己嘅培訓中心，加埋起緊嘅足足有成97間，又會不斷去設計教材、課程去培訓員工。鄭文珍舉例有一堂表達能力，就差唔多佢哋超過40萬員工都上過，假設日日開班仲未計入訓練導師嗰條數，就要五年至做得完。平保董事馬明哲平時咁識「Sell」公司，唔知有冇上過堂？