市場徐想：港交所 強勢有道理
呢期大家都講二○一一年經濟前瞻，喺低息嘅環境之下，錢都要搵出路架，股、樓、資源、金就梗係升到唔停啦。由於冇一個國家夠膽帶頭加息，喺無可奈何之下，睇嚟資產泡沫會變成一個「細水長流」嘅問題。
恒指由九月嘅低位20,400點左右，一個月左右就爆上23,000點樓上，無貨喺手，都咪話唔心痛。不過，大家唔好心急，只要佢企穩喺22,700點，都仲未係太遲，繼續留意同追蹤。
筆者喺本欄講港交所（00388），已經有一段日子，正如之前所講，港交所的確係「升勢早有因」，AMS3.8、小型QFII、吹緊水嘅「直通車」、黑池、人民幣計價產品、加埋筆者成日講嘅「中港金鐘罩」（即中港股市同步），形態上完全配合，所以港交所由九月120元升上160元，係意料中之事，如果回吐，150元係一個好嘅買貨位。