期指攻略：港股升浪 進入無阻力區

滬綜指於長假後復市的第二個交易日，再升2.5%，即使日本及台灣等股市已開始出現調整，美元跌勢亦有放緩迹象，然而港股在突破23,099點海嘯高位後，完全無停步嘅意圖。尋日在兩大石油股支持下，再升263點，收報23,207點，向大家示範乜嘢叫做超買唔代表見頂！

尋日A股收市後，內地傳人行計劃再加銀行存款準備金率0.5%，到底A股市底有幾強，今日應該可試一試水溫。事實上，近期市場對壞消息免疫力之強，是出乎預期，尤其當人行對人民幣升值立場軟化，熱錢湧入中資股的情況更甚，淡友不宜過分期望可因消息而「減低損失」。

技術上，升穿23,099點後，港股進入無阻力區，淡友無謂硬頸，要將利潤放大，不妨選擇筆者近日方式，逐步將揸好倉止賺位上調，跌穿就平倉離場再想，今日止賺位在23,100點。

提防賣地見反高潮

今日賣地，肯定係港股焦點所在，令人有點意外的是，測量師行的估價極為樂觀。筆者唔係地產專家，純屬個人意見，如果毗鄰地皮已投得，其他發展商出價意欲必定受影響，即使合作，出價也不會太高，估得極樂觀的成交價會否為市場帶來意外？今日會有答案，如果港股要藉消息回吐的話，記緊留意賣地消息。