溫婉容出山坐鎮財策會

基金界女強人溫婉容（Eleanor）喺金融界退下火線，原來已經成十六個月，早幾個月正式加入香港財務策劃師學會做行政總裁，佢話依家一星期返四日工，仲有時間享受生活。

Eleanor喺基金界打滾咗差唔多廿年，做過德盛安聯資產管理香港CEO，亦喺景順同法興等基金公司擔任過要職，上年話退休，都令太子有啲意外。尋日佢同太子分享一啲心聲，話以前做嘢好忙，連同媽媽傾偈嘅時間都無，加上坐骨神經痛，覺得個人要relax吓，辭職後利用年幾時間做自己喜歡做嘅嘢，包括讀中醫課程同打Golf等等。依家雖然做番全職，但佢覺得財策會係非弁利機構，同以前要跑數嘅工作方式唔同，覺得份工有意義。

改革CFP關照打工仔

加入財策會後，佢其中一個目標喺改變攞CFP（認可財務策劃師）資格進程，除咗終極嘅CFP資格外，可能會加入「中途資格」，比本來已有財策經驗，但無時間讀書嘅打工仔，一步步向CFP資格進發。另外，財策會已向政府建議成立獨立嘅監管機構，專門監督來自銀行、保險公司及投資中介等賣投資產品嘅銷售過程，希望保障投資者利益。