另外,一如所料,喺本周三賣地前,地產股強勢持續,信置(00083)升4.7%、新地(00016)、長實(00001)及恒地(00012)同升逾2%,美聯(01200)亦重上50日線及250日線,收報7.18元。不過,阿莊就會選擇喺十月施政報告前,把握喺高位沽出地產股獲利嘅機會。
總括而言,昨日升市有交投配合,且藍籌股升勢頗為全面,顯見期指結算前,好友真係去到盡,唔排除呢轉要一口氣踢上今年高位22,671點先至會抖氣,下一個挾倉目標可能係內銀股。
新股炒風有餘未盡
呢期新股之風熾熱,本周就有5隻新股陸續掛牌,另據講將有超過10隻新股自本周起陸續展開招股活動,「晒士」較大嘅有金風科技(02208)及永暉焦煤(01733)。咁多新股排隊上市,最受惠嘅當然係港交所(00388)。
即將展開招股活動嘅新股之中,有一隻叫賽晶集團,主要從事內地軌道交通及電網高端產品供應,聽講公司早前已引入主要客戶──A股公司中國北車(601299)為策略股東。翻查資料,原來咁啱阿莊上周提及過嘅北京中信系公司事安集團(00378),早喺北車入股前已經投資賽晶嘅優先股,但股價似乎未反映呢個消息。
講開北車,上海電氣(02727)早前便聯同北車,與阿爾斯通簽署《上海軌道交通裝備產業發展平台合作備忘錄》,共同打造上海軌道交通裝備產業發展平台。目前,上海電氣已成為內地最大型嘅綜合性裝備製造集團之一,近年重點發展新能源產業及高效清潔火電設備。
未來不愁炒作藉口
今年上半年,公司實現純利14億元人民幣,截至今年六月底,其手持核電核島設備定單已突破180億元人民幣,風電機組業務亦漸成規模。踏入「十二.五規劃」期,國策將積極扶持七大戰略性新興產業,公司憑藉喺新能源及高端裝備製造業嘅領導地位,嚟緊唔愁炒作藉口。
股價方面,去年中以來,其股價一直喺3.2至4.2元水平上落,昨日股價異動,突破五十二周高位4.08元,全日高位4.14元,收報4.11元,升4.3%,若然今次能夠確認突破長期橫行區,將展新升浪,爆發力不容小覷。
戰報
耀萊集團(00970)
姚午齊本月二十一日指出耀萊集團發展空間廣闊,當日低位0.95元,昨日股價創出1.11元的新高,升幅16.8%。
+16.8%
神州數碼(00861)
阿莊本月十五日推介神州數碼,指其估值具上調空間,股價昨日高見13.94元,較推介當日低位12.38元,升12.6%。
+12.6%