滙控啲大班不嬲都有間山頂中峽道嘅大班屋，紀勤由倫敦搬來香港前，屋主係亞太區主席鄭海泉。不過，間大屋換親主人都要大事裝修，閒閒哋幾個月。就係咁，紀勤喺香港咁耐，一直都寄居酒店，據聞係中環嘅四季酒店。點知，間屋都未裝修完，紀勤就遞信唔撈。間大班屋今次連新主人都未見過，又要換主人。

歐智華香港有層樓

不過，候任行政總裁歐智華會唔會住山頂大班屋就未知，就算住都可能要改裝吓，襯番自己口味。據講，歐智華一啲都唔抗拒喺香港住，幾年前佢已經喺麥當勞道買咗個住宅，二千幾呎，一般人可能覺得夠晒大，但依家貴為候任大班，就似乎細咗啲。老友話，佢間屋位處大廈嘅極高層，景致非常好，仲可以睇到滙豐銀行總行。