今年三月底被證監會懷疑招股章程載有虛假或誤導性資料，而遭勒令停牌嘅半新股洪良國際（00946）宣布，董事會已決定賠償予投資者，但方案容後公布。呢個做法，喺香港可以話係破天荒。作為小股東，當然想快啲「鬆綁」，但事件亦足以顯示監管當局把關不力，除了賠錢了事，宜認真檢討保薦人制度，免重蹈覆轍。

放大圖片

放大圖片

此外，中策集團（00235）昨日中途停牌，聽聞有關收購南山人壽一事遭對岸當局否決，究竟呢單嘢點收科，真係要等睇戲，但今次事件亦教曉投資者，世事無絕對，要成就大事，天時、地利、人和，缺一不可，人家講好大機會成事係一回事，投資者本身落注亦要量力而為，冇得輸打贏要。

地產股唔跌得去邊

昨日政府拍賣九龍塘住宅地，發展商反應熱烈，最終以12.85億元成交，成交價超出市場預期。麵粉價格繼續企喺高水平，麵包價格亦唔跌得去邊，地產股即使升勢受制於政府嘅打壓炒風措施，但暫看大跌嘅空間仍然有限。

阿莊周一見報推介嘅中國龍工（03339），昨日逆市升5%，收報6.65元。此外，昨日提及嘅華潤水泥（01313）亦逆市靠穩，收報3.85元，升0.7%。祖國不斷花錢搞基建，涉及基建類嘅股份嚟緊可以繼續受惠國策。

講開呢類股，令阿莊印象深刻嘅有中國建築（03311），股價由六月份低位2.15元反覆向上，昨日收報4.04元，三個月累計升幅超過八成，真係走寶！

繼續依國策行事，又睇睇半新股雷士照明（02222）。今年上半年實現銷售收入達到2.04億美元，同比增長85.9%；純利2,593萬美元，去年同期虧損859萬美元。期內，燈具收入同比增長逾八成至9,907萬美元，而節能產品收入則達到1.23億美元，同比增幅81%，佔總收入60.8%。

節能減排係國策所向，呢一點唔需要有質疑。雷士食正呢條水，未來節能照明產品銷情可予憧憬。受季節性因素影響，加上公司期內中標嘅政府招標項目產品喺下半年才付運，預期下半年業績可優於上半年，全年度業績可再報佳音。

雷士昨日收市報3.48元，升7.7%，成交1.03億元。該股喺五月掛牌，招股價2.1元，公司今次宣布中期業績虧轉盈，而且派發中期息每股兩港仙，投資者叫好，估值獲得上調。

以今年預測市盈率二十倍計，股價可反覆向3.8至4元水平推進，可喺3至4元水平高沽低揸。

戰報

瑞聲聲學（02018）

史提芬指瑞聲貴得有道理，尋日開市後反覆向上，並高見14.62元，以低位13.38元計，單日升幅近9.3%。

中國龍工（03339）

阿莊周一建議趁龍工佳績炒一轉，股價昨日逆市呈強，更創6.85元一年高位，較推介當日低位6.26元升9.4%。