本文重點
港交所（00388）交易大堂尋日收市後出現感人一幕！話說喺交易所做咗三十三年保安工作、人稱「蔡沙展」嘅保安主任尋日榮休，港交所行政總裁李小加特別喺收市後落咗交易大堂歡送佢，又邀請交易大堂一眾出市員一起同「蔡沙展」道別，同埋影相留念。交易所更特別喺呢個小型歡送會，準備蛋糕同飲品，都算周到。
除咗出市員同「蔡沙展」感情深厚外，其實傳媒行家亦對佢有好深印象，因為工作關係，傳媒成日要去交易所，佢主要管交易大堂保安，咪成日見到「蔡沙展」囉。大家嘅感覺係佢總愛穿白恤衫，身形少許胖，好好人。
半生守護交易大堂
「蔡沙展」原來早喺「股壇校長」李福兆年代已做緊，差不多半世人都喺交易所做，為人傳統、忠心，早已視交易所為自己屋企。除咗佢本人外，佢太太亦喺交易所交易大堂做保安，更係交易所唯一的女保安。
今次「蔡沙展」榮休，將會弄孫為樂，日後亦可以車太太返工，非常sweet sweet呢！