美國最終會唔會出現雙底衰退，一如八、九十年代的日本一樣？筆者的主觀預測，是機會不大，始終伯南克做聯儲局主席前，任教普林斯頓大學，是研究一九二九年大蕭條的權威，如果伯蛇都搞唔掂，恐怕都無乜人可以代替到佢撥亂反正。其次，美國同日本銀行體系好唔同，銀行政策執行到銀行處理壞帳的能力及靈活性上，比思想守舊的日本銀行家勝過九條街，筆者並不太擔心美國經濟陷入雙底衰退，只擔心持續的大規模量化寬鬆，幾年之後，會令鈔票大貶值，滯脹或者高通脹一發不可收拾。

放大圖片

放大圖片

大市未肯作出調整

大藍籌業績出得七七八八，港股走勢沒明確方向，恒指上星期五跌91點，報20,981點。恒指今浪仲留低咗個上升裂口20,728點未補回，但近期有迹象唔多願意回試此水平，一來五月中18,971點起步的升浪，到高位21,805點，0.382的回吐支持位剛好在20,723點，同埋50日線目前在20,684點，都同裂口相當接近，多個重要支持位匯合，形成即使滙控（00005）及中移（00941）兩隻重磅股業績後走勢麻麻，但大市始終唔肯來一次似樣調整。以技術走勢，如果先回補裂口甚至去到20,388點，即係升浪的五成回吐，相信短線炒家止蝕盤會湧現，大市來個修正，後市發展會更健康。

電動工具生產商創科（00669）出中期業績，六個月做咗125億元生意，同比升10.5%，銷售額較管理層早前給大行賓架的單位數字理想，主要歸功於新產品提高毛利率，純利升幅更達40.5%，去到3.62億元。

業績續有改善空間

創科屬於相當少數可以從OEM（原設備生產）成功轉為OBM（自有品牌生產），生意仲愈做愈大的港商。目前三個電動工具品牌Milwaukee、AEG及Ryobi，在歐美市場已站穩陣腳。回顧六個月銷售額，大約比高峰期○八年下半年的135億元低7.5%，但純利率2.9%，卻比金融海嘯前最強勁的○六年下半年的5.12%低近四成四，由此可見，北美洲經濟仲係同幾年前有一段大距離，至少消費信心指數近半年只在67至75之間徊徘，同海嘯前的85至104差距唔細，不過從另一個角度，也可看成創科仲有相當改善空間。北美零售業周期處低點，預期市盈率13.4倍幾乎是歷史中下限水平，或者買貨之後未必立即見爆炸性的發展，但相信目下頗值得低位收集，靜待行業周期好轉、估值提升的日子來臨。