本文重點
尋日大新銀行（02356）慶祝灣仔嘅證券服務中心開幕，執行董事藍章華（John）自然要出嚟講番幾句。阿John笑笑口話滿意證券客戶嘅增長，年底前希望開夠20間證券中心，仲話認得幾個喺股票機前作戰緊嘅股民係大新老顧客。太子睇見周圍記者啲閃光燈係咁閃，但呢幾位老顧客依然處變不驚，專心搏殺。
雖然呢班老顧客片刻不離咁望住股票機，但最終都畀阿John吸引咗注意力。事關大新為隆重其事，專登訂咗隻燒豬嚟助興。
股民休戰品嘗燒豬
阿John非常肉緊咁話，隻燒豬來自灣仔出晒名嘅燒臘店，猛咁叫人食多啲之餘，特登向搏殺緊嘅老顧客提供「專人遞燒豬服務」，等大家可以一同品嘗。可能被大新嘅誠意感動，幾位老顧客破天荒提早幾分鐘休戰，品嘗大新嘅友善招呼。
阿John咁識得哄客戶歡心，大家食得津津有味。所以太子幾時都話，用心對待顧客，啲客係感受得到！