本文重點
渣打集團（02888）前主席戴維思無做銀行家之後，轉做咗英國貿易與投資部長，雖然依家連部長都冇做，公開演講用詞仍然尖銳，開始有政治家嘅風範。全世界都鬧班銀行家淨係識保住啲花紅、獎金嘅時候，戴維思都睇唔過眼，仲鬧得好大聲、好直接，佢話曾經為咗呢啲銀行文化覺得好羞恥，尋日佢就喺上海高呼銀行界要減薪。
批嘯後僅關心花紅
戴維思尋日喺上海金融論壇，對住幾百個論壇與會者，猛烈批評啲銀行家。佢話好多金融機構將四至五成嘅盈利分畀班高層，咁高薪有乜可能年年維持到？佢仲鬧班銀行家，喺金融海嘯後嘅半年，依然淨係關心自己份人工同花紅有冇影響，而唔係一齊諗計搞掂個爛攤子，作為銀行家嘅戴維思，話當時覺得好羞恥，佢仲驚現場與會者聽唔明，再重複講羞恥呢個詞。
戴維思連金融公司股東都教訓埋一份，又話佢哋只顧眼前利益兼非常短視。換句話講，即係想佢哋要長線投資，唔好逼公司年年賺到盆滿缽滿。