港股市況近期都跟住外圍反覆回軟，投資者紛紛為資金搵位「泊碼頭」，除咗傳統上用作避險嘅公用股，中資基建股亦得到唔少保守型投資者嘅注視。無他嘅，因為阿爺最近重申對西部大開發嘅雄心壯志，將錢向西部傾斜，亦要令到當地經濟發展可以得到顯著改善。
講開又講，正所謂「人生有幾多個十年」，「西部大開發」呢個計劃真係十年前就已經啟動，但由於種種原因，以致計劃未能夠取得全面成功，但阿爺政府今期「落重藥」，明顯比上一次嚟得實在，重點係強化西部地區嘅綜合交通網絡、訊息基礎設施同水利基礎設施嘅建設。
喺「西部大開發」呢個大前提之下，於香港上市嘅基建股─中鐵（00390）、中鐵建（01186）及中交建（01800）近來都升咗唔少。事實上，呢三隻基建股喺○七至○八年時市盈率一度飆升至三十多倍以上，但由於佢哋盈利增長理想，加上現股價比當年為低，值得留意。