農行（01288）繼續苦守招股價3.2元，收市報3.21元，成交高達29億元，若扣除農行成交額，可見大市實際成交僅約410億元，再咁落去，班港交所（00388）高層都幾頭痕！
昨日滬綜指得以高收作結，主要係市場對中央政府再度出手刺激經濟嘅預期升溫。內地傳媒引述中金首席經濟學家哈繼銘等專家指出，鑑於經濟增長放緩嘅迹象愈來愈明顯，政府可能會開始調整政策，包括可能加快審批投資項目，減少對房地產嘅宏觀調控，以及放寬資本流動控制。
其實，目前官方嘅語調仍然堅持繼續調控，憧憬「鬆手」只係投資者一廂情願。不過，阿莊確實擔心，一旦要等到有更多經濟數據支持「鬆手」嘅需要，可能為時已晚，特別係如今內需已成推動經濟增長嘅唯一有力引擎，一旦消費者對前景憂慮升級，勢必影響消費信心，內需動力已有不足，若增長趨勢動搖，對整體經濟嘅打擊實在難以估量。所以，季內不能完全排除中央改變初衷嘅可能性，總之見步行步！
手持嘅平保（02318）已停牌兩個幾星期，有待公布旗下平安銀行與深圳發展銀行嘅重大資產重組事項，H股停牌前報64.35元。
摩比業績迅速走樣
此外，早前阿莊提及過嘅摩比發展（00947），上周居然就中期業績發盈警。呢隻股喺去年十二月才掛牌，招股價3.38元，萬料不到唔夠一年，份業績就唔見得人，又真係幾離譜，股東條氣肯定唔順。
公司將原因歸咎於電訊設備嘅集中招標採購延至今年六月後、高毛利3G產品銷售減少，以及行政及研發費用增加所致。
不管今年六月後公司嘅定單會否呈明顯復甦，但正所謂「一朝被蛇咬」，股票選擇何其多，都係另作他選為妙。同樣係電訊設備股，不如穩穩陣陣，冷敲中通服（00552）。
早前公司管理層明言，將受益於三網融合，近月見有基金兩度入場增持，確實值得關注。
畢竟，公司有多年穩定嘅往績及派息可供參考，並由兩大流動電訊商出任大股東，正所謂「肥水不流別人田」，現價往績市盈率為十二倍，息率就有3.2厘，照計應該仲有得博。過去一年股價積弱，至今年次季終於止跌回升，但交投唔係幾活躍，價值型投資者會較為合適。
戰報
堡獅龍（00592）
Sammi昨日建議跟進堡獅龍，其股價逆市呈強，最高升上0.6元，以低位0.55元，單日升幅達9%。
五礦資源（01208）
上周四姚午齊指五礦資源仍處上升軌，果然無懼跌市，昨日高見2.85元，較推介當日低位2.64元升近8%。