尋日港股成交額縮水至唔夠400億元，恒指彈唔起，仲要陰陰落，呢種走勢最棘手，奉勸大家盡量減持股票，增持現金，因為連前大摩全球策略員碧斯都係咁做，志強當然要同專家一致行動。
香港建設（00190）跟其他內房股一樣，近呢兩個月喪跌咗一段時間，至上月股價曾低見0.46元，跌至嚴重超賣水平。但睇番集團最新數據，淨負債比率只有10.2%，跟其他內房股相比，財務狀況極度健康。再計一計每股資產淨值為1.2元，以昨日收市價0.55元計，折讓高達54.1%，相信現水平再跌風險有限。
集團截至○九年十二月底止，錄得盈利14.57億元，每股盈利0.1448元，較○八年大幅虧損26.46億元大有改善，主要因投資物業公平值調整，出現非現金盈利10.85億元。預期今年呢方面唔會再有咁出色表現，但以其現價往績市盈率只有3.8倍計算，就算盈利減一半，市盈率都不過八倍有找。博NAV折讓比率收窄至40%，股價可見0.72元，現價買入，跌穿0.51元止蝕。
香港建設（00190）目標價：0.72元 止蝕價：0.51元