農行（01288）IPO今日中午截飛，大小券商都積極推介，但看來散戶認購反應都係一般。阿莊最關心嘅係大型新股集資活動告一段落後，大戶唔需要再托住個市，港股會否追回外圍嘅跌幅，再次下試19,000點關支持。喺睇清楚方向前，惟有以靜制動，切忌心急溝貨。
上周阿莊亦講過，市場上愈來愈多「中國經濟蕭條論」，最近溫總都話，雖然目前中國經濟保持良好形勢，但國內外環境極為複雜，國際金融危機影響嘅嚴重性同經濟復甦嘅曲折性都超過咗預期，宏調政策面對很多「兩難」問題。
據官方傳媒引述，這些「兩難」問題，包括人民幣升值、經濟過於依賴出口、勞工成本增加意味着企業成本上升等等，諸如此類嘅矛盾如何解決，就連北大人亦都感到頭大！
A股未具反彈條件
滬綜指上月底失守2,500點後，一直落到2,300點水平始見回穩，但睇官方對經濟形勢嘅評價，除非有新嘅刺激經濟措施出台，否則A股市場嘅沽壓仍大，暫未具大幅反彈嘅條件，而滬綜指2,500點已成為一個主要阻力位。
國企指數現處11,100點水平，考慮到中資股氣氛，唔排除呢轉跌市，國指要下試10,700至10,800點水平支持。
個股方面，萬眾期待嘅三網融合首批試點已正式公布，地區包括北京、大連、哈爾濱、上海、南京、杭州、廈門、青島、武漢、湖南省長株潭地區、深圳及四川綿陽。業界預期，未來六年，三網融合拉動嘅投資金額將達到4,000億至6,000億元人民幣，電訊設備商勢必受惠，而三大流動電訊商亦可藉此擴闊業務層面，包括經營電視頻道、IPTV及互聯網，發展全方位業務，以解決新客戶增長放緩嘅問題。
至於對電訊商而言，亦顯現新商機，好似來自電視廣告的收益。近年上海IPTV發展迅速，估計用戶已達100萬戶，有線電視用戶則達400至500萬戶，除用戶收費外，大部分收益均是來自廣告。講開電訊商，阿莊唔只一次提及聯通（00762），上月以來，其股價走勢之強，亦沒有令人失望。昨日再度逆市向上，收市報10.78元，升2.08%，成交3.33億元，表現跑贏同類股及大市。聽聞聯通跟聯想（00992）合作推出嘅「樂Phone」，市場反應良好，而末季聯通即將推出iPhone 4，亦勢必成為市場焦點，相信股價可保持強勢，已上車者，可以繼續穩坐釣魚船。
戰報
維達國際（03331）
積奇昨日推介維達，認為集團可受惠人民幣升幅，股價由昨日低位6.8元，最高升至7.3元，單日升幅達7.3%。
+7%
廸生創建（00113）
冼金基上周三推介的廸生，昨日逆市做好，股價高見5.58元，較推介當日低位5.36元，上升超過4%。
+4%