本文重點
世界盃開鑼後，好多機構都趁住呢個機會搞番啲活動畀客戶或員工。恒生商業銀行業務處上周五夜晚喺蘭桂坊舉辦「世界盃狂熱」活動，邀請咗超過100名熱愛足球嘅商業銀行客戶，一齊觀賞巴西對葡萄牙嘅精彩賽事。
恒生當然好識做，啲高層包括副總理兼企業及商業銀行業務主管陳力生、商業銀行業務主管林燕勝，同埋佢哋客戶關係團隊，都嚟撐場陪班客戶睇波。太子相信佢哋都好樂意咁做，反正喺屋企睇咁靜局，不如同班客戶一齊盡歡，可乘機同班客搞好啲關係。
估中賽果有獎
太子聽佢哋講，嗰晚啲氣氛都好熱鬧，銀行同客戶打成一片，除咗睇波之餘，仲有豐富嘅美食。恒生更加喺當晚搞咗個「眼光獨到」有獎遊戲，邀請客戶在賽事開始之前競猜球賽結果，呢場賽果都唔係咁易估，唔知有幾多人估中呢？