本文重點
世界盃係近期城中熱話，唔少打工仔都要捱更抵夜睇波，不過361度（01361）就好體恤員工，實行畀同事遲一個鐘頭返工，等佢哋可以安心欣賞比賽。公司總裁兼執董丁伍號就話自己都有睇世界盃，仲話今屆嘅巴西隊好有團隊精神，力撐佢哋第六度捧盃添！
丁伍號讚巴西夠團結
近排朝早搭車返工，經常見到啲晚晚捱夜睇波嘅打工仔闔緊眼瞓。丁總同太子講，361度係體育用品公司，自己同唔少同事都係運動發燒友，自然明白睇完波返工有幾咁痛苦，於是就批准所有辦公室同事們遲一個鐘頭返工。
一講到自己力捧嘅巴西隊，丁總就即刻眉飛色舞咁話巴西以前一向以踢法華麗出名，不過，丁總就話今年嘅巴西好唔同，好有冠軍相，皆因球員除咗技術好之外，仲好有團隊精神，佢仲話希望公司職員都咁有團隊精神，實行做體育用品公司中嘅巴西隊喎！