港股都夠晒趕客，有波幅無升幅，成交得480億元，點數升11點，報19,632點，買賣兩閒，比較特別係騰訊（00700），又再跌10元，去到127.4元，短短四個交易日跌咗23.5元或者一成六，且成交一日大過一日，可見沽壓唔細。

市場傳言滿天飛，一時話受衍生工具影響，有指騰訊網上虛擬貨幣「Q幣」被政府相關機構調查，更有傳言話其網上遊戲收入，近月增長有放緩迹象，才招致洗倉，姑勿論邊個至係真正答案，四日間騰訊市值蒸發咗430億元，居然仲未有人知真正病因，可見高溢價基金股，風險可以好大，以2,330億港元市值及預期全年純利78.4億元人民幣計，預期市盈率26倍，可能是近年最平的一刻，但史提芬都係唔建議徒手去接掉下來的刀。

內地樓市未見冷卻

中央雷厲風行，打擊樓市炒風，滿以為樓市可以由熱變暖，四、五月份再由暖變冷，政策效果慢慢浮現，但從國統局新鮮出爐數據，同估計出入都幾大，上月商品房銷售面積按月跌15.8%，去到6,777萬平方米，全國七十大城市售價按年升12.4%，漲幅只係比四月收窄0.4%，按月仲係升緊0.2%，可見仲係量跌價微升的局面，到底係數字滯後，抑或內地炒家當中央無料到，恐怕要多兩三個月數字至可以睇得更清楚，但近期股市期望中央會因為「歐豬」危機拖累出口，而暫緩冷卻炒樓措施出台，睇嚟可能性唔大。

早前內地調高天然氣價，加埋新奧（02688）傳聞影響，燃氣股由基金至愛變成燙手山芋，跌到一仆一碌。尋日北控（00392）管理層話正向國家部門申請調高氣價，以保持買氣與供氣價格的差額，亦認為天然氣價依然是內地市民可以接受的範圍，相信申請短期可批。

鑑於路橋及啤酒業務過往不穩定的表現，近年北控銳意配合國家環保及燃氣供應政策，發展管道燃氣及污水處理業務，估計佔總收入比重會由去年五成六，升至今年大約六成甚至六成五，管理層緊張外間對供氣毛利的睇法實屬正常。

筆者並非對綜合性企業有偏見，但啤酒、燃氣、污水處理投資的估值，可以相差好大，且行業盛衰周期有別，亦令史提芬一直對真金白銀押注北控，興趣並不太大。

燃氣股通街平貨

以北控現在接近500億元市值計，今年估計賺29.4億元，市盈率十七倍，同啤酒業一哥青島啤酒（00168）接近二十八倍一併，北控好似好抵！但對唔住，啤酒生意僅佔北控總收入大約三分之一，好難直接比較。如果睇好供氣生意前途似錦，純供氣股新奧不過十三倍，鄭州燃氣（03928）更係單位數字，因為綜合企業畀咁大溢價，抵唔抵，見仁見智，但目前平嘅燃氣股通街都係，北控相信好難成為反彈第一波受惠者。