本文重點
內地五月份出口增長數字遠超於預期，但由於消息早於前日已喺市場廣泛流傳，故見昨日A股現好消息出貨，滬綜指低收作結，報2,562點，跌21點。港股唔上唔落，成交依舊淡靜，恒指收報19,632點，升11點。新股反應冷淡，大家都傾向唔做唔錯。短期市況仍受外圍表現制約，料恒指會繼續喺19,000點水平上落。
基金股繼續輪流洗倉，汽車股吉利（00175）挫7.7%，東風（00489）及駿威（00203）同跌逾4%、比亞迪（01211）跌3.7%；龍頭科技股騰訊（00700）急挫7.2%，阿里巴巴（01688）及聯想（00992）同跌逾4%。
對於騰訊股價急挫，市場流傳多個版本，其中一個係指與投行發行相關嘅衍生工具即將到期有關，又指係同內地有關部門關注「網上貨幣」問題有關，孰真孰假不得而知，未清楚前都係唔好胡亂撈貨。
與內地出口數字出現類似嘅情況，雖然五月份CPI尚未正式公布，但昨日市場已盛傳，該數字將超逾3%嘅警戒線。不過，即使真係「過界」，阿莊相信未必會係一個趨勢，故不宜單憑此評論人民幣升值或人行加息嘅可能性。
世界盃今晚開鑼，股市或會更加淡靜，但啤酒市場銷情就例牌暢旺。喺港股中，啤酒股要數龍頭嘅青啤（00168），其他還有北京控股（00392）（旗下燕京啤酒），以及由廣東省政府控股，喜力為次大股東嘅金威啤酒（00124）。
全面恢復盈利能力
講開啤酒股，聽聞嘉士伯啤酒廠剛斥資逾23億元人民幣增持重慶啤酒12%權益。中國內需保持增長，外資酒廠一向睇好內地啤酒市場，啤酒股有價，故雖然身處大淡市，但青啤市盈率仍高達三十三倍，市帳率5.3倍；A股燕京啤酒（000729）市盈率四十三倍，市帳率3.6倍。
睇番金威啤酒，現價市盈率顯得頗高，達一百七十二倍，事緣公司因擴產與市場情況未配合，○七年及○八年度均蝕錢，至去年才轉盈，賺1,452萬元，惟市帳率僅0.92倍。由於金威已大致完成擴產，去年資本性開支已明顯下降，加上其銷售已擴展至廣東省以外市場，如無意外，今年上半年公司可更全面恢復盈利能力，現價估值遠低於同類股，有得博，缺點係成交唔多，好考投資者耐性。